أنا ونفسي -1-

يا قلبها .. مسكين ما يدري ..
إن الهوى سكين يجرح ولا يبري ..
وإن الوهم أحلى حقيقة في الغرام ..
وإن الحبيب اللي تبيه .. أحلام ..
.
.
.

هي  : إيييييييييه تبقى الأحلام أحلام يايزيد..

أنا : الحلم حلم ( لا ياشيخ  ) .. الحلم أمل وأمنية وحاجة .. الحلم حياة .. والحياة ماتزين للي أخذ منها كل شيء .. إلا إن كان له حلم !
وأجمل مافي الأحلام أنها لا تتحقق !!

هي : شلون طيب  ..!!

أنا : جمال الحلم في ساعات الإنتظار لهاذاك الشيء الجميل .. اللي تدفعنا لتحقيقه ..
أنت ماتدرين إن الفقراء عاشوا وأقل من فقرهم .. همهم ..
وإن الأغنياء ماتوا وأكثر من غناهم .. همهم ..

إغرسي بداخلك بذرة حلم .. واسقيها بتفاءلك .. وحرارة انتظارك ..

أنتي مشكلتك أنك تبحثين عن الفرح بالخارج وعند الغير .. وماتدرين إن الفرح مقيد فيك .. يناديك .. ويأشر لك  ..!
بس أنتي مقززة ماتشوفينه !

هي  : لو هو فيني كان شفته وماتركته  ..!

أنا : ماتدرين إن الفراشة ماتشوف بالظلماء  ..؟!
وأنتي قلبك مليان بسواد الحزن واليأس  ..؟!

هي  : وش لون أضيء قلبي ..

أنا : ركبي عليه لمبة  ..! أبلشتين تراتس أنتي وأسألتس اللي ما تخلص  ..

هي : أهيء .. أهيء .. وراك علي  ..

أنا : أنتي بس طلي على قلبك بوجهك وابتسمي .. وقولي الحياة حلوة دام فيها واحد زيي ..

ابتسمي وتفاءلي وتبي تشوفين ..